Каникулларда эшкә урнашучы мәктәп укучыларына күпме түләячәкләр?

Быел Чаллыда 3 меңләп мәктәп укучысын эшкә урнаштыру планлаштырыла. Хәзерге вакытта әзерлек эшләре бара. Шәһәр оешма-предприятие һәм мәктәп җитәкчелеге белән очрашулар үткәрелә. 

«Балаларга хезмәт хакы түләүгә шәһәр бюджетыннан 32 млн сум акча бүленеп бирелде. Укучылар узган ел сыман 2 сәгать түгел, көненә 4 сәгать эшли алачак. Бер айга 12 мең сум чыга. Моннан тыш, өстәмә 2650 сум материаль ярдәм түләнеләчәк», – дип белдерде мәшгульлек үзәге директоры Татьяна Быданова. 

Узган ел укучылар арасында 30-36 мең сум алып эшләүчеләр дә булган. 

Ел башыннан Чаллының мәшгульлек үзәге 2 меңләп оешма-предприятиегә балаларны эшкә урнаштыруны сорап хатлар юллаган. Теләктәшлек белдерүчеләр күп, ди Татьяна Быданова. Ул алдынгы предприятиеләрне атады. 

«Татпроф», «КАМАЗ», «РАССТАЛ», "КАМАЗжилбыт", "Кориб", "Сатурн" , «ТЭЦ» предприятиеләрендә эш югары дәрәҗәдә оештырылган. Вахта автобуслары йөри, укучыларга форма бирәләр, төшке аш ашаталар», – ди.

Чаллы предприятиеләренә эшкә урнашырга теләүчеләр мәшгульлек үзәгенә, мәктәп, яшьләр үзәгендә хезмәт куясы килгән укучылар студент хезмәт отрядларына мөрәҗәгать итәргә тиеш.