Күршеләренә дип чыгып киткән ирне трассада машина бәрдергән

13 ноябрь көнне кич белән Яр Чаллы – Сарман юлында җәяүлене бәрдерделәр. Хатынының сүзләренә караганда, Новотроицкое поселогында яшәүче 33 яшьлек исерек хәлдәге әлеге ир күршеләренә дип чыгып киткән булган. Җирле пункттан читтә хәрәкәт итүгә карамастан, киемендә яктылык кайтаручы элементлары да булмаган.

Бәрдерүче – «ВАЗ-21140» автомобилендә баручы 19 яшьлек егет. Йөртү стажы – 10 ай. Кичке 5ләрдә Сарман районыннан чыгып киткән булган, юлда ике кешене дә утырткан. Автоинспекторлар аны югары тизлектә барган дип билгели.

Фаҗига вакытында җәяүле күп имгәнүләр алган: баш мие селкенгән, арка, бил, аяк сөякләре сынган. Ашыгыч ярдәм хезмәткәрләре аны БСМПга алып киткән. Ир-ат бүгенге көндә комада. 

фото: Тукай районы автоинспекциясеннән