Пассажирлар утырган автобус юл кырыена чыгып очкан

Түбән Кама районында пассажир автобусы катнашында юл-транспорт һәлакәте булган. Бу хакта ТР буенча Эчке эшләр министрлыгы матбугат хезмәтендә хәбәр итәләр. 

Ведомство мәгълүматлары буенча, 25 февральдә 15:30 минутта Чистай — Түбән Кама автомобиль юлында Hyundai автобусы кюветка очкан. Шаһитлар сүзләренчә, салонда 40ка якын кеше булган. Пассажирларга тиешле медицина ярдәме күрсәтелгән, зыян күрүчеләр юк. Килеп чыккан хәлнең барлык шартлары ачыклана.