Сочи хөкүмәте яңгыр сулары чокырына рәшәткәне су басмасын өчен куелмавын әйткән

Берничә көн элек биредә ир бала батып үлде. Әмма рәшәткә куймау су басудан коткаручы бердәнбер чара булып тора. Районның үзенчәлегенә карап, биредә конструкцияләрне рәшәткә белән ябарга ярамый.
«Лазаревское районында Октябрьская урамындагы яңгыр сулары өчен су чокырлары 60нчы елларда ук салынган — алар ачык типтагы махсус гидрокорылмалар. Алар бистәнең һәр урамында бар һәм чокырлар тулысынча ачык булырга тиеш, проектта рәшәткә кую каралмаган. Рәшәткәләр куелган очракта көчле тропик яңгырлар вакытында алар ычкынып, кешеләргә куркыныч тудырырга мөмкин”, дип аңлатканнар хакимияттә.
Чокырлар исә торак йортларны һәм биналарны су басудан, агызып китүдән саклый. 2016 елда әлеге районның Тхагапш бистәсендә су басу очрагы булган да инде.
Алдан  малайның яңгыр сулары чокырына төшеп китүе, әбисенең аны коткарырга тырышуы, әмма нәтиҗә булмавы хәбәр ителгән иде. Коткаручылар баланы үле килеш ачык диңгездән табып алган.
Россия Тикшерү комитетының Сочи буенча Тикшерү идарәсе Лазаревское районы бүлеге әлеге факт буенча тикшерү уздыра.
Якшәмбе көнне баланың мәетен әтисе һәм хастаханәдән чыккан әбисе Татарстанга алып кайта.

https://tatar-inform.tatar/