Ул – гүзәл затларның эталоны

Боларга тагын  мөлаем, тырыш, максатчан һәм башка бик күп уңай сыйфатларны өстәргә булыр иде. Равилә ханымны якыннан белгән кешеләр дә, аның белән эшләгәннәр дә бу сүзләр белән килешәдер дип уйлыйм.

Чыннан да, Равилә ханым тормышта да, гаиләсендә дә күпләргә үрнәк. Шуңа күрә аны яраталар, хөрмәт итәләр. Аның белән горурланалар. Язмам герое  тумышы белән Балтач районының Нөнәгәр авылында туган. Казан дәүләт авыл хуҗалыгы институтында укыган. Биредә икътисад һәм идарә факультетын тәмамлаган. Һәрвакыт белемгә, камиллеккә омтылган. 2014 елда Казан федераль университетында укып, юрист белгечлеге алган.  Һәм тормышын шәһәребез халкына хезмәткә багышлаган. Башта ул социаль яклау идарәсендә инвалидлар белән эшләү буенча беренче категорияле белгеч булган. Биредә эшләгәндә авыр хәлдә калган кешеләргә һәрвакыт ярдәм итәргә тырышкан ул. Яшь булуына карамастан, гамәлдәге кануннар нигезендә, кеше хәленә кереп, ярдәм кулы сузган. Шуңа күрә дә аны шәһәрдәшләр хөрмәт белән искә ала. “Егылып, аягымны сындыргач, инвалидлык буенча лаеклы ялга чыктым. Ул вакытта социаль яклау идарәсендә физик мөмкинлекләре чикле кешеләр белән Равилә  эшли иде. Нинди сорау белән килсәң дә, үтенеч-гозерләребезне җавапсыз калдырмады. Документлар ясатканда да, санаторий, тернәкләндерү үзәкләренә  юлламалар алганда да булышты. Безнең кебек язмыш сынаган кешеләргә игелекле булганы өчен хөрмәткә лаек ул. Шунысын да әйтергә кирәк, ул кешелекле булуы өстенә, тырыш, белемле, кануннарны, карарларны яхшы белә”, - ди шәһәрдәшебез  Нәкыя Яруллина.

Аннары үз эшен намус белән җиренә җиткереп  башкарган Равиләне Яр Чаллының инвалидларны тернәкләндерү үзәге бухгалтер-хисапчысы, социаль яклау идарәсенең халыкка адреслы социаль ярдәм күрсәтү фондының исәп-хисап бүлеге мөдире итеп куялар. Бу урыннарда да ул тиз арада үзен җаваплы хезмәткәр итеп таныта.

Равилә Зарипова җитәкчелегендәге ЗАГС идарәсе коллективы кешеләрнең тормышында булган вакыйгаларны истә калырлык итеп уздырырга тырыша. Балага исем кушу йоласы һәр милләтнең гореф-гадәтләрен, традицияләренә нигезләнеп оештырыла. Никахлары тематик даталарга туры килгәндә теркәлү тантанасы аеруча кызыклы һәм үзенчәлекле үтә. 25, 30, 50 ел бергә гомер иткән кешеләрнең бәйрәмнәрен дә матур итеп уздырырга булышалар биредә. “Әти белән әнинең бергә торуларына 50 ел тулуга багышланган бәйрәмне ЗАГС белән берлектә үткәргән идек. Аллаһка шөкер, бик матур узды. Гаилә кыйммәтләрен, гореф-гадәтләребезне саклауны максат итеп куйган мондый чаралар балалар һәм оныклар өчен бик кирәк. Алар әби-бабайларының, ата-аналарының тормышын үрнәк итеп гаилә корырга тиешләр”, - ди шәһәрдәшебез Земфира Әхмәтҗанова.

Эльвира ханымның фикерләрен башкарма комитетның аппарат җитәкчесе Гөлнар Әхмәтова да хуплады. “Нинди генә эшкә алынса да, Равилә Гыйльметдин кызы аны бик яхшы итеп, кимчелексез итеп эшли. Ул шәһәр тормышында актив катнаша. Пенсия фонды белән берлектә гаиләләрендә икенче һәм өченче балалары туган гаиләләргә тантаналы шартларда ана капиталы тапшыра. Равилә гаиләсендә -  балаларының терәге булган, кадерле, хөрмәтле  әни. Малай һәм кыз үстерделәр. Алай гына да түгел, ул инде яраткан әби дә”, - диде ул.

Чыннан да Равилә Зарипова күпкырлы эш алып бара. Ул пенсия фонды, мәктәпкәчә белем бирү учреждениләре белән төрле чаралар үткәрә. Балалар бакчаларында малайлар һәм кызларга гаилә кыйммәтләре турында сөйли. Нәниләрне кызыксындырган сорауларга җавап бирә. Гаиләләрендә икенче һәм өченче балалары туганнарга “Энергетик” мәдәният сарае һәм пенсия фонды хезмәткәрләре белән берлектә ана капиталы сертификаты тапшыруны бәйрәмгә әйләндерде. Балтач районында туып- үскән якташлар җәмгыятен дә җитәкли ул. “Без якташыбыз белән горурланабыз”, - диләр аның турында якташлары. Кыскасы, Равилә Зарипова һәрвакыт кешеләргә матур бәйрәм мизгелләре бүләк итәргә тырыша. Аның фидакарь хезмәтен республика һәм шәһәр җитәкчеләре дә  югары бәяләде. Ул шәһәр хакимияте башлыгы, ТР Министрлар кабинетының рәхмәт хаты, “Бөтенроссия халык санын үткәрүдәге казанышлары өчен” билгесе һәм башкалар белән бүләкләнде. Ә аның өчен иң зур бүләк - хезмәтеннән канәгать булып киткән кешеләрнең рәхмәте. Шәһәребезнең гүзәл затлары аны үзләренә үрнәк итеп куялар. “Равилә ханым – барыбыз өчен дә үрнәк шәхес. Ул матур һәм зәвык белән киенә, үзен һәрвакыт карый, кешеләр белән дәрәҗәсен белеп, әмма үзен гади тотып сөйләшә. Эшен ипләп кенә, җайлы итеп алып бара. Машинаны оста итеп йөртә. Шәхесләр гади була, дигән сүзләр аңа туры килә дисәм дә, ялгыш булмас. Ул бар яктан да эталон. Шуңа күрә аны җитәкчеләр дә, гади халык та хөрмәт итә. Кыскасы, без, хатын-кызлар, аңардан үрнәк алып, аның кебек булырга омтылырга тиешбез”, - ди хореография мәктәбе педагогы, режиссер Алсу Җаббарова. Алсу ханымның киңәшен тыңлап, тирә-ягыбыздагы хезмәтләре һәм үзләрен җәмгыятьтә тотышлары белән өлге булган Равилә Зарипова кебек шәхесләрдән үрнәк алсак, тормышыбыз да, эшебез дә уңышлы барыр иде.