Чаллы егете Казанга эшкә кайтты

Санкт-Петербургның Н.Напалков исемендәге онкология үзәгендә эшләүче Чаллы егете, хирург-онколог Азат Нәҗмиев эш урынын алыштырды. Бу хакта ул үзе хәбәр итте. 
– 5 ел Санкт-Петербург онкология үзәгендә юан эчәктәге яман шешкә операция ясадым. Тикшерүләр үткәрдем, укыдым, тәҗрибә тупладым. Бу яхшы мәктәп булды. Хезмәттәшләремә һәм остазларыма рәхмәт. 
Тормышымда яңа этап башланды. Павленко Мәктәбенә кердем. Остазым – Татарстанның баш трансплантологы, Сигал исемендәге республика клиник онкология диспансерының баш табиб урынбасары  Александр Киршин. Без Казанда. Мин гепатобилиар хирургияне үзләштерәм, – диде ул.
Азат Нәҗмиев 15 елга якын Санкт-Петербургта яшәгәч, туган ягы – Татарстанга кайтты. 
«Әлегә 2 елга, озак командировка киткән кебек кенә кайттым. Өйрәнергә, операцияләр ясарга, дәваларга, тәҗрибә тупларга. Киләчәктә нәрсә булыр: анысын вакыт күрсәтер. Әмма мин бер нәрсәне беләм: алга хәрәкәт итмәсә хирург үлә. Мин исән-сау, халкыбыз сәламәтлеген ныгыту юнәлшендә эшләргә әзер», – дип белдерде якташыбыз. 

Татарстанда «Яшьләр һәм балалар» илкүләм проекты гамәлгә ашырыла.
Фото Азат Нәҗмиевның социаль челтәрдәге битеннән алынды