“Кече мэрлар”

Комсомол районына Сидоровка, ГЭС, ЗЯБ, Ороловка, Рябинушка, Суар, Кызыл Чаллы поселоклары, Мәләкәс Аръягы, Элеватор тавы һәм егерме өч комплекс керә. Биредә 138 мең кеше теркәлгән.

Комсомол районында барлыгы 26 территориаль иҗтимагый үзидарә бар. Бу районның ТИҮ Ассоциациясе рәисе Ольга Айдимирова. Ул биредә 2016 елдан эшли.

– “Татарстан Республикасының иң яхшы ТИҮ” конкурсында грантлар отып, соңгы биш ел эчендә безгә 10 миллион 600 мең сум акча кергән. Боларга 19 балалар мәйданчыгы, тренажерлар, «Воркаут» спорт мәйданчыгының  элементларын куйдык, җәяүлеләр өчен тротуар салдык, дүрт комплекста юллар ремонтладык, – ди Ольга Викторовна.

“Төзекләндерү һәм яшелләндерү буенча территориаль иҗтимагый үзидарә проектлары” дип исемләнгән шәһәр конкурсында дүрт ел эчендә 34 проект җиңеп, 5 миллион 810 мең сум акча алганнар. Бу акчаларга да балалар өчен уен мәйданчыклары куелган, 2 сквер җиһазландырылган, 6 ишегалды юлы ясалган.

Комсомол районы территориаль иҗтимагый үзидарәләре ел саен чәчәкләр фестивалендә дә, ишегалды спорт төрләре фестивалендә дә уңышлы катнашалар.  

– Ишегалды спорт төрләре фестивале өлкәннәр декадасында уздырыла. Биредә өлкәннәр, ветераннар актив катнашып, былтыр безнең район беренче урынга чыкты, – ди Ольга Айдимирова. – Җиңү бәйрәме уңаеннан сугышта катнашучыларны һәм тыл ветераннарын өйләренә барып котлыйбыз.

«Мәктәпкә җыенырга ярдәм ит» акциясеннән дә, инвалидлар, өлкән буын кешеләре декадасыннан да беркайчан да читтә калмыйлар Комсомол районы территориаль иҗтимагый үзидарәләре. Күпбалалы, имин булмаган гаиләләрне дә игътибарсыз калдырмыйлар алар.

– Быел “Яр Чаллы шәһәренең иң яхшы ТИҮ” конкурсында катнашу өчен гариза бирдек. Хәзерге вакытта нәтиҗәләр көтәбез. Бу конкурс кысаларында шәһәр буенча ТИҮләрнең рейтингы ясалачак, – ди Ольга Викторовна.

“Безнең ишегалды” программасы кысаларында былтыр Сидоровка бистәсендә яңа юллар, парковкалар, балалар мәйданчыклары ясалган. Эшләр барышын ТИҮ җитәкчесе Анна Ратникова күзәтеп торган.

– Хәзер Сидоровка бистәсен танырлык түгел. Бездә 45 йорт бар, аларның барлык ишегаллары да яңартылган. Эшләр барганда мин биредә “яшәдем” дисәң дә була, – ди ул. – Иртәнге 7дә чыгып кичке 8гә кадәр эшчеләрнең ясаганнарын карап тордым, чөнки без халык мәнфәгатьләрен яклыйбыз, аларга уңайлы булсын өчен тырышабыз.

Сидоровка бистәсеннән тыш, былтыр “Безнең ишегалды” республика программасы кысаларында ЗЯБ бистәсенең 17 комплексы, ГЭСның 3 комплексы да яңартылды. Бүгенге көндә бу ике комплекста эшләр тәмамлану алдында тора. Быел исә бу республика программасы буенча 4нче комплекс һәм 6/11 кварталының ишегаллары төзекләндереләчәк.