Кыздырып маринадланган баклажан

Кирәк була:5 кг баклажан, 3 аш кашыгы тоз, 0,5 кг суган, 4-5 тырнак сарымсак, үсемлек мае.
Рассол өчен: 2 стакан су, 0.5 стакан 6% лы аш серкәсе, дәфнә яфрагы, 6-8 бөртек кара борыч.

Әзерләү:
Баклажанны юабыз һәм кабыгын әрчибез, юка гына итеп телемләп зур савытка турыйбыз. 3 аш кашыгы тоз салып, 2 сәгатькә алып куябыз. Согы чыгарга тиеш.

Баклажан ял иткән арада суган һәм сарымсакны әзерлибез: суганны ярым боҗралап турыйбыз, ә сарымсак тырнакларын урталай бүләбез.

Табага 2 аш кашыгы үсемлек мае салып, суын сыркыткан баклажан телемнәрен ике яклап җиңелчә кыздырып алабыз. Телмнәрне кәстрүлгә 3-4 см калынлыкта катламлап тезәбез – катламнар арасына суган, сарымсак салабыз. 

Тозлык әзерлибез. Савытка 2 стакан су салабыз, кара борыч, дәфнә яфрагы, ярты стакан аш серкәсе өстибез. Кайнатып чыгаргач, әлеге рассолны яшелчәләр өстенә коябыз. Капкачын ябабыз да суынгач 1,5-2 тәүлеккә суыткычка куябыз.

Ә кышка саклау өчен баклажанны чиста банкага шулай ук катламлап тутырып, банканы 15 минут стерильләштерергә, капкач белән ябып куярга кирәк.

Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).