Газдан аермасыннар дисәгез

"Чаллыгаз" оешмасы белгечләре ел башыннан шәһәрдә тикшерүләр үткәрә. Бүгенге көнгә алар Чаллыда 53 абонентка зәңгәр ягулык бирүне чикләгән. Әлеге кулланучылар газдан дөрес файдалану кагыйдәләрен үтәмәгән. "Бу исә бик тә аяныч тәмамланырга мөмкин. Төмән, Рязань, Ивановск өлкәләрендәге газ шартлап йортларга һәм кешеләргә зыян килү очракларын һәркем хәтерлидер. Мондый очракларга бүтән юл куймаска кирәк", - дип белдерде "Чаллыгаз" оешмасы баш инженеры Сергей Корнилов. Оешма бүгенге көнгә 177 мең торак бинага хезмәт күрсәтә. Ел ахырына газ тикшерүчеләр барлык абонентларын да йөреп чыгарга исәп тота.