Бабайны коткара алган булырлар иде...

Өеннән чыгып китеп югалган 73 яшьлек Фәнис Шәрәфуллинны үле килеш таптылар. Олы яшьтәге кешенең кисәк юкка чыгуы бик күп шәһәрдәшләребезне борчуга салды. Ә инде аның әллә кая еракта да түгел, үзебезнең Татарстанда бер табылып, аннары, кешеләр янында  ярдәм таба алмыйча, бу дөньядан интегеп китеп баруы барысын да  тәмам тетрәндерде. Ни өчен болай килеп чыкты соң?! Фаҗигагә китергән шул көннәрне барлыйк. 

Шәрәфуллин Фәнис Гыйлембаян улы Чаллының 18 нче комплексында ялгызы гына яшәгән. 9 февраль көнне ул «Опель Вектра» машинасына утырып, өеннән чыгып киткән. 
Волонтерларның мондый «ориентировка»ларын без «Шәһри Чаллы»ның социаль челтәрләрендә шактый еш урнаштырабыз. Тик бу юлы язылучылар югалган ир-атка аеруча игътибарлы булды, табылу-табылмавын сорап яздылар. Ул кемнеңдер бакча күршесе, хезмәттәше булган, кемдер аның татар исем-фамилиясенә игътибар иткән. Ул шулай ук ТР атказанган артисты Габидулла Хөрмәтуллинның да яхшы танышы булып чыкты. Җырчы редакциябезгә шалтыратып, эзләү эшләрендәге яңалыкларны сорашты, үзенә урын таба алмавын әйтте.

«Авылдашым Фәнис бик яхшы кеше. Бик матур яшәделәр, хатыны мәрхүмә булгач, кайгысыннан төшенкелеккә бирелгәндер инде. Аның югалуы турында ишеткәч, бик борчылдым. Табылса яхшы булыр иде», – диде ул.  

11 февральдә волонтерлар Фәнис Шәрәфуллинның машинасы Чистай районы Данауровка авылы янында табылуын хәбәр итте. Машинаның ишеге ачык, салоны буш булган. Шуннан кеше югалуы турында мәгълүмат Чистай районы социаль челтәрләрендә дә таратыла башлаган. 
Без аның кызы Ләйсән белән элемтәгә кердек. Ул әтисенең югалган көннәре турында сөйләде.

«Подъезддагы камерадан карап белдек, әти 9 февраль төнге икедә өеннән чыгып киткән. Ул ялгызы яши иде. Әниебез яман шештән ел ярым элек үлде. Әти аны бик юксынды, әлбәттә, депрессия дә булгандыр. Тик шулай да хәтере үз яшенә күрә яхшы иде. Ул төнне машинасына утырып Чистайга юл тоткан. Ник анда? Башыбызга да килми, чөнки без анда элек яшәмәдек, анда бер туганыбыз да, хәтта танышлар да юк сыман. Дөрес, әти югалгач, үз статусларыбызда, шәһәр группаларында бу хакта яздык һәм танышлар табылды, алар бүген дә безгә ярдәм итеп тора. Чистайга барып җиткәч, күрәсең, машинасының бензины беткәндер, ул аннан чыккан. Аны якындагы икмәк заводында эшләүчеләр күреп алган. «Сөйләшүе аңлашылмый иде», – дигәннәр. Яшь ир-егет участковыйны чакырткан. Анысы әтине Үзәк район хастаханәсенә илтеп куйган. 

Камералардан күренгәнчә, әти 10 февраль иртән хастаханәдән чыгып киткән. Танышларым әйтүенчә, чыккач, ул әле ярты сәгатьләп хастаханә тирәли йөргән. Мин бу хәлне әле дә аңлый алмыйм. Кеше бит начар сөйләшә, югалып калганы күренеп тора, телефоны да юк. Урамда нишләсен ул, ник аны җибәргәннәр?!
Аннары әтине кибетләрдә, урамда күргәннәр. Тик бу вакытта әле аның югалуы турында мәгълүмат таратылмаган иде. Без туганнар белән аны шунда барып көн дә чиратлап эзләдек, «ЛизаАлерт» төркеменнән волонтерлар да эзләде, листовкалар таратты.

Полициягә гариза яздым, тик кызганычка каршы аннан шалтыратучылар булмады. Үзем шалтыратып сорагач, яңалыклар юклыгын әйттеләр. 
Машинасын барып алгач, анда яткан телефонын карадым – тавышы сүндерелгән иде. Әти, кайвакыт ялгышып, шулай кирәкмәгән кнопкага баскалый. Шуңа ул мин шалтыратканны ишетмәгән дә инде», – дип борчылып сөйләде Ләйсән Нәбиуллина. 

13 февральдә волонтерлар авыр хәбәр җиткерде – Фәнис Шәрәфуллин табылган, тик исән килеш түгел. Ул туңып үлгән. Мәете зияратта табылган.   
«Көне-төне баштан бер уй чыкмый. Ничек болай килеп чыкты соң бу? Без гел бер адымга соңарганбыз булып чыга. Машинасын табу белән бардык  – әтине хастаханәгә алып киткәннәр. 112гә шалтыратып ориентировка тараттык, ә әти инде хастаханәдән чыгып киткән. Менә-менә табарбыз кебек иде...» дип уртаклашты шәһәрдәшебезнең кызы. Ул безгә әтисенең соңгы, мөгаен, хастаханәгә илткәндә кемдер төшергән фотосын җибәрде.

Чаллының «ЧелныПоискВасилиса» эзләү төркеме администраторы ярдәмчесе Ландыш Шәрипова фикеренчә, бабайны вакытында коткарырга мөмкин иде. Моның өчен кеше югалуы турында бик күпләрнең белүе кирәк. Ә Чистайның зур интернет төркемнәренең берсендә битарафлык күрсәткәннәр – яңалыкны һәрвакыт күренеп торырлык (закреплять) итеп урнаштырмаганнар. «Чаллы администраторларыннан эшләргә өйрәнегез! Югалучылар турында чаң сугуыбыз нәтиҗәсендә бездә 100 процент диярлек кеше исән килеш табыла! Сүзем юк. Дөрес ориентировканы җибәрдем, ә сез аны күрмәмешкә салышасыз. Оят! Сезнең якыннарыгызны Аллаһы Тәгалә  шундый хәлгә калудан сакласын» дип яза ул шул төркем комментарийларында.
Бүгенге көндә тикшерү эшләре бара. Ай дәвамында суд-медицина экспертизасы әзер булачак. Ул, мөгаен, хәзерге вакытта билгесез калган сорауларга ачыклык кертер. 
Фәнис Шәрәфуллин тумышы белән Мөслим районыннан, тормыш иптәше Зәй районынан булган. Аны васыяте буенча тормыш иптәше янына җирләгәннәр.

«ЧелныПоискВасилиса» эзләү-коткару  отряды хәбәр итүенчә, 2024нче елда аларга 65 кешенең якыннары мөрәҗәгать иткән. 19 балигъ булмаган бала, 35 өлкән яшьтәге кеше исән-сау табылган. 4се үлгән, 4сенең әлегәчә кайда икәнлеге билгеле түгел. Хәтере югалган бер кеше дә исән-сау табылган.