Чаллыда 47 яшьлек җәяүлене бәрдерделәр

Казан проспектында җәяүле катнашында авария теркәлде. "Фольксваген Тигуан" машинасы 47 яшьлек ир-атны бәрдерде. Ул юлны тиешсез урыннан чыккан була. Аны хастаханәгә озаттылар. Хәзер ул травматология бүлегендә дәвалана. 

Шунысы аяныч, бу беренче очрак түгел. Өч ай эчендә җәяүлеләр катнашында 28 авария теркәлде. 28 кеше төрле тән-җәрәхәтләре алды. 10 яшьлек баланың гомере өзелде. Ул да юлны тиешсез урында чыга. Машина бу вакытта зур тизлек белән хәрәкәт иткән була. (фаҗига турында монда язган идек) 

Инспекторлар әйтүенчә, аварияләргә күп очракта җәяүлеләр үзләре сәбәпче. Юл кагыйдәләрен бозалар, җитмәсә, ашыгалар, игътибарсыз йөриләр. Тиздән каникуллар җитә. Бу вакытта ата-аналарга балаларына игътибарлырак булырга, күбрәк аңлату эшләре алып барырга чакыра ЮХИДИ хезмәткәрләре. Җәй көне велосипед, самокатта йөрүчеләр катнашында юл-транспорт һәлакәте бермә-бермә арта, ди алар. Әйтик, узган ел 15 авария теркәлде. (Бу хакта моннан укый аласыз).