Күкрәк яман шешен булдырмас өчен нәрсәләр эшләргә кирәк?

Хатын-кызларда була торган рак төрләре арасында күкрәк яман шеше беренче урында тора. Моның сәбәпләре төрле булырга мөмкин, әмма авыруның килеп чыгу куркынычын киметә торган ысуллар бар, һәм аларны гадәткә кертергә кирәк. Болар хакында маммолог сөйләгән.

Беренчесе – даими рәвештә физик активлык белән шөгыльләнү. Атнасына 120 минут физкультура онкология куркынычын 5 процентка киметә.

Икенчесе – рационга омега-3 май кислоталарын кертү. Болар диңгез балыгында була.

Өченчесе – алкогольдән баш тарту. Алкоголь – канцероген, һәм ул яман шешнең теләсә кайсы төрен китереп чыгара ала. Куркынычы булмаган микъдар юк, дип ышана табиб.

Дүртенче – салатларны зәйтүн мае белән болгатып ясарга кирәк. Бу – организмны шактый сәламәтләндерә, чөнки зәйтүн мае Урта диңгез кухнясындагы төп элемент булып тора, ә бу төр кухня иң файдалысы булып санала.

Бишенче – ай саен үз-үзеңне тикшереп, карап тору. Үзгәрешләр булу-булмауны белү өчен, сөт бизләрен капшап карарга кирәк. Бернинди авырту булмаса да, әгәр тиренең төсе, халәте, формасы, размеры үзгәрә икән, табибка барырга кирәк.

фото: https://ru.freepik.com