Чаллыда Нәүрүзне билгеләп үтәчәкләр

18 мартта Чаллыда Нәүрүз бәйрәмен билгеләп үтәчәкләр. Чара шәһәрнең “Җиңү” паркында көндезге уникегә планлаштырылган. Аның кысаларында милли атрибутикалар күргәзмәсе, “Чишмә” халыклар дуслыгының үзешчән сәнгать коллективлары чыгышы тәкъдим ителәчәк, җырлы-биюле уеннар оештырылачак.

Мәгълүм булганча, Нәүрүз  төрки һәм фарсы телле халыкларның бик борынгыдан килгән бәйрәме. Ул 21 мартка көн белән төн тигезләшкән көнгә туры килә. Бу көнне иске календарь буенча Яңа елны каршы алганнар.

Идел буе татарлары аны чәчүгә чыгар алдыннан билгеләп үткәннәр. Балалар өйдән-өйгә кереп, сый-хөрмәт җыеп йөргәннәр. Соңыннан исә бергәләшеп уеннар оештырганнар, күңел ачканнар.