Чаллыда өлкәннәр ункөнлеге кысаларында чаралар үтәчәк

Тиздән өлкәннәр көне җитә. Шәһәрдә барлыгы 150 010 пенсионер яши. 14 кеше 100 яшьтән узган. Чаллының иң өлкән кешесе Василиса Шахматовага 8 сентябрьдә 104 яшь тулды. Шәһәрдә 872 Бөек Ватан сугыш ветераны яши.

Өлкәннәр ункөнлеге кысаларында 29 сентябрдән 6 октябрьгә кадәр  барлык районнарда концертлар уза. Шәһәркүләм бәйрәм 4 октябрьдә «Энергетик» мәдәният сараенда үтәр дип көтелә. 

Башкарма комитет җитәкчесе урынбасары Рамил Хәлимов: «Без өлкәннәребезне ункөнлектә генә түгел, һәр көнне хөрмәт итәргә тиешбез», – диде.

Сүз уңаеннан, өлкәннәр ункөнлеге кысаларында пенсионерларга киләсе елга «Шәһри Чаллы» газетасын бүләк итәргә була. Чаллының мактаулы гражданины, Татарстанның атказанган мәдәният хезмәткәре Гөлзада Рзаева ярты ел саен, үз хисабына,  почта аша 5-6 кешене «Шәһри Чаллы» газетасына яздыра.

Хөрмәтле җитәкчеләр, депутатлар аннан үрнәк алып, өлкәннәргә 6 ай буена туган телдә газета уку шатлыгы бүләк итсәләр, ветераннар гына түгел, без «Шәһри Чаллы»лылар да рәхмәтле булыр идек.