Үсемлекләрне авырулардан ничек сакларга?

Бор кислотасы. Ташкабак, теплицадагы помидор, борыч һәм баклажан чәчәген койса яки кыяр аз яралса, бор кислотасы эремәсе әзерләгез. 500 мл кайнар суга 2 грамм бор кислотасы кушалар. Аннан 10 литрга җиткереп су өстәргә кирәк. 

Аш тозы. Аш тозы чөгендерне балландыра. 4-5 чын яфрагы чыккач, һәм уңышын җыярга 1 ай кала, төбенә аш тозы эремәсе сибәләр. 10 л суга 0,5 стакан тоз кушыла. Суган чебененнән саклау өчен суганга да тоз эремәсе сибәргә мөмкин. 

Гәрчич порошогы. Гәрчич – теплица тәрәзәләрен юу өчен бик яхшы чара. Лайлач әкәм-төкәмнән зарарланучы үсемлекләр тирәсенә коры гәрчич сибәргә була. Кортычлардан саклау өчен июньдә крыжовникны гәрчич эремәсе белән эшкәртергә ярый. 10 л суга 100 грамм гәрчич порошогы салып 2 көн төнәткәч, сөзәргә hәм яртылаш су кушарга. 10 л суга 40 грамм сабын кушарга да мөмкин. Шушы ук эремә белән чәчәк атып бетергән җиләк-җимеш агачларын да эшкәртергә ярый. Ул алма кортыннан, гөблә, кандалалардан котылырга да ярдәм итә.

Чәй содасы үсемлекләрне ончыл чык чиреннән сакларга булыша. 1,3 л суга 1 чәй кашыгы чәй содасы кушылган эремәне кыярга сибәргә мөмкин.