Зиратларны бергәләп төзекләндерделәр

«Туган авылым Чирмешән районы Бәркәтә авылында 2 кибет, мәктәп, клуб эшли. Безнең авылда элеккеге традицияләр яши. Зур эшләрне өмәләр оештырып, бергә башкарабыз. Мәчет бар, халык йөри. Балалар мәйданчыгы төзеделәр. Чишмәләрне төзекләндерделәр. Авылыбызны төзекләндерү, зиратларны тәртиптә тоту буенча күп эш башкарылды.   Авыл гына түгел, районыбыз да үсә. Бу – җитәкчеләрнең, халыкның туган як язмышына, аның киләчәгенә битараф булмыйча бергәләп эшләү нәтиҗәсе. Авыл зиратларын төзекләндерүдә туганым Ринат Гыйләҗев башлап йөрде. Аның идеясын район башлыгы Рамил Айбатов хуплады, үз ягыннан ярдәм итте, эшләр барышы белән даими танышып торды», – ди ул. 

«Зират – изге урын. Анда авылыбызда яшәгән һәм чит җирләрдә гомер иткән якташларыбызның әби-бабасы, әти-әнисе, туганнары, якыннары, дуслары җирләнгән. Иртәме соңмы һәрберебез мәңгелек йортка – шунда барачак. Йорт  чиста, каралган  булырга тиеш. Мәңгелек йортыбызны чистарту, яңарту, тәртиптә тоту – безнең изге бурычыбыз гына түгел динебезгә, милләтебезгә карата  хөрмәт, гореф-гадәтләребезне баетуда да изге адым булып тора. Былтыр сентябрь аенда башлаган изге эшебезне тәмамладык дисәк тә була. Югары оч зиратының ике капкасын гына ясарга калды», – ди Ринат әфәнде.

Бу эшкә авыл халкы да, авылдан чыгып башка җирләрдә яшәүчеләр  дә акчалата ярдәм иткән. Эшләрне бергәләп башкарганнар. Барлыгы 710 мең сум сәдака жыелган. Төзекләндерүдән калган акчага зиратларны тәртиптә тоту өчен гербидцид һәм башка кирәк-яраклар алырга планлаштыралар. 

Бәркәтәлеләр ял көннәрендә 20шәр кеше җыелып зиратлардагы 480 метр иске коймаларны сүтеп, яңа матур койма куйганнар. Түбән һәм югары оч зиратлары, ике мәчет урыны – 1320 метр яңа койма белән әйләндереп алынган.  Аръяктагы иске зиратны чистартып, буяганнар. 

«Өмәдә катнашкан, акчалата ярдәм иткән кешеләргә  бик зур рәхмәт. Менә алар игелекле кешеләр: техника  hәм белән булышкан авылдашлар –  Азат Шагитов, Марат Сәйфетдинов, Равил Гирфанов, Илһам Мусин, Фәнис Морзаханов, Илнар Батгетдинов, Хәлил Кашапов, Минсәгыйт Гайфетдинов, Ленар Нурмөхәммәтов, Рафис Мусин, Фәнил Мөхәмәтҗанов, Илдар Абдуллин, Рифкать Әхмәтҗанов, Хафиз Миргалимов, Радик Әхмәтҗанов. Бетон болгату техникасы белән  Акдәс Миргалимов, Ринат Закиров, генератор белән Радик Галиев булышты. Фәргат Мифтахов, Әмир Нуриев, Рамил Минһаҗев эретеп ябыштыру эшләрен башкардылар.

Өмәнең беркөнен дә калдырмаган Азат Минхаеров белән Тәнзилә Галимовага да рәхмәтебез зур. Изге эштә катнашкан һәркемгә Аллаһы Тәгалә әҗер-савапларын, чиксез рәхмәтен  бирсен. Аллаһы Тәгалә аларның үзләренә һәм  якыннарына, исәнлек-саулык, тыныч тормыш, бәрәкәтле гомер насыйп итсен. Киләчәктә  дә бергә һәм бердәм булыйк», – ди Ринат Гыйләҗев. 

Фотолар Фәнисә Сәлахиевадан алынды