Мерәстә – Раббани дәмамчылары
Җәй җитү белән күңел Сабан туен көтеп яши башлый. Туган якларга кайтып, туган-тумачалар, сабакташлар, дус-ишләр белән очрашып, күңел ачып алу өчен менә дигән форсат бит бу. Гадәттәгечә, милли бәйрәмебез эстафетасын иң элек авылларыбыз кабул итеп ала. Таң әтәчләре белән торып эш башларга күнеккән сала халкы монда да беренче. Әйе, язгы кыр эшләре төгәлләнгән, инде бераз ял итеп алырга да хакы бардыр җир кешесенең. Хәер, кемгәдер ял, ә кемгәдер зур сынау чоры. Егетлеккә, батырлыкка сыналыр чак та бит әле ул - Сабан туе. Сүзем милли бәйрәмебезнең төп геройлары – көрәшчеләр хакында. Мәйданнарга чыгып, бил алышканчы үзләре белән очрашып, аралашып алмый дөрес булмас дидек тә без, ут күршеләребез Тукай районына юл тоттык.
