«Безнең ишегалды»на парковкалар керми

– Программа кысаларында без парковкалар төзү белән шөгыльләнмибез, фәкать җәяүлеләрнең тормышын уңайлы итүне күздә тотабыз. Әгәр ишегалдында парковка өчен урын юк икән, димәк, ул анда бөтенләй булмаска да мөмкин, – дип искәртте шәһәр мэры Наил Мәһдиев. 

Мэр шулай ук төзекләндерелгән ишегалларында тәртип булырга тиеш, ди. Сүз йорт яны территориярендә чәчәк түтәлләре булдыру, аларны саклап-карап тоту турында бара. 

Шәһәрдәшләр дәүләт хезмәтләре порталында 2023 елда төзекләндереләчәк ишегаллары өчен тавыш бирүдә катнашты. Нәтиҗәдә Чаллының 19 ишегалды программага кертелде. Иң актив тавыш бирүчеләр 62нче комплекста яши. Аларның ишегаллары беренче булып төзекләндереләчәк.