Чаллы журналистлары Питрәчкә китте

Татарстанның Питрәч районында журналистлар Сабан туе уза. Төрле шәһәр-районнардан 600дән артык каләм ияләре җыелды.

"Шәһри Чаллы" редакциясе дә биредә. Газетаның баш мөхәррире Резидә Юсупова, урынбасары Илшат Солтанов, журналистлар Сәрия Гарипова һәм Гөлия Ибәтуллина, машина йөртүчебез Хәлил абый Фәрдиев Чаллы данын яклаячак. 

Журналистлар Сабан туе икенче ел рәттән уздырыла. Узган ел ул “Татмедиа” акционерлык җәмгыятенең 15 еллыгы уңаеннан оештырылды. 

"ТАТМЕДИА" акционерлык җәмгыятенең генераль директоры Шамил Садыйков бәйрәмгә килүчеләрне сәламләде. "Милли гореф-гадәтләребезне саклап, әби-бабайлардан килгән шушы бәйрәмне үткәрү - зур дәрәҗә. Икенче тапкыр үткәрәбез. Бу традициягә керсә, бөтен кешегә дә аның файдасы булачак", - диде ул. 

Чыннан да, әлеге бәйрәм төрле район журналистларына танышып-аралашу өчен менә дигән чара. Алай гына да түгел, биредә каләм осталарын чын-чынлап сыныйлар да.  Капчык киеп сикерү, аркан тарту, көрәш кебек төрле уен-бәйгеләр әзерләнгән. Иң җитезләрен һәм көчлеләрен бүләкләр көтә. Көрәштә җиңүчегә вәгъдә итәләр.