Чаллыда яшәүче ир-ат: «Шәһәрне шартлатам»

Чаллы судында хокук сакчыларын алдаган чираттагы ир-ат эше каралды. Хатыны белән исерткеч эчемлекләр кулланганнан соң, араларында тавыш чыга. 38 яшьлек ир-ат полиция хезмәтенә шалтырата. "Чаллы 2 минут эчендә юкка чыгачак. Террористик акт оештырам", дип яный. Урынга хокук сакчылары, кинологлар килеп җитә. Тикшерү барышында бернинди шартлаткыч та табылмый. Хәбәр ялган булып чыга. 

Закон буенча ялган рәвештә полиция, ашыгыч ярдәм һәм янгын сүндерү хезмәтләрен чакыручыларга 1 мең сумнан алып 1,5 мең сумга кадәр штраф яный. Гаепләнүче ир-ат административ җаваплылыкка тартылды. Аңа 1 мең сум штраф салынды, дип хәбәр итә Чаллы судының матбугат хезмәте.