Чаллыда «Пятёрочка»га ут төртүче - хатын-кыз

ЗЯБ бистәсендәге «Пятёрочка»га ут төртүчене тоттылар. Ул – авыр шартларда яшәүче 40 яшьлек хатын-кыз. Төнге якта чүплек савытыннан үзенә әйберләр эзләгән һәм тәмәке төпчеген сүндермичә чүплек савытына ташлаган. Янгын чыккач хатын-кыз куркып урыннан качкан. 

Исегезгә төшерәбез, янгын 15 август иртәнге 4нче яртыда чыкты. «Пятёрочка» кибетенең бер өлеше янып бетте. Моннан тыш янда торучы 3 иномарка да зыян күрде. Аларның берсе янып бетте, калган икесенә 50-120 мең сумлык зыян салынды. 

Янгын чыгаруда гаепләнүче хатын-кыз гаебен таный һәм тикшерү белән хезмәттәшлек итә. Аңа җәза төре тикшерү тәмамлангач билгеләнәчәк.