Татарстанда ипи, он һәм май кыйммәтләнгән

Татарстанда бер атна эчендә, 12-19 августта, кыяр, бодай оны, шулай ук арыш һәм арыш-бодай ипие кыйммәтләнгән.

Мисал өчен, кыярның бәясе 6,81 процентка артып, килограммы 95,84 сумга җиткән. Ак май һәм көнбагыш мае – 777,99 һәм 120,65 сумга, майлылыгы 2,5-3,2 процент тәшкил иткән сөт – 86,79 сумга, бодай оны – 42,57 сумга, арыш һәм арыш-бодай ипие 67,43 сумга кадәр арткан.

Моннан тыш, Татарстанстат җиде көн эчендә бәясе кимегән азык-төлекне дә билгеләп үткән. Әйтик, кишернең килограммы – 4,18 процентка (хәзер ул 51,84 сум тора), чөгендер – 2,8 процентка (50,72 сум), бәрәңге 3,58 процентка (50,65 сум) арзанайган. Балалар өчен яшелчә консервалары, кәбестә, башлы суган һәм бананның бәясе 1 процентка кимегән.