Бәби көтүче Алия Карачуринага: «Кыз туса да, малай булса да Рифат дип кушыгыз!»

Җырлы гаилә Алия белән Ришат Төхвәтуллиннар бәби көтәләр. Социаль челтәрләрдә Алия үзенең язылучыларыннан киңәш сорап язды. 

- Дуслар, сезнең ярдәм кирәк. Ришат бала туганчы җенесен әйтмәскә кушты. Исемнәрне һаман уйламадык әле. Миңа ошаганы Ришатка ошамый, Ришат әйткәне – миңа. Матур малай һәм кыз исемнәре сайларга булышыгыз әле, – дигән ул.

- Иң матур исем – Рифат. Кыз туса да, малай туса да шулай кушыгыз, – дип комментарий калдырган җырчы Рифат Зарипов.

- Ләйсән Гыймаева: «Таңсылу, Зифа, Зәйнәп», – дип, үз кызларының исемнәрен санап чыккан.

Берәү исә: «Пост куясыз да, барыбер үзегез теләгән исем кушасыз. Сез беренчеләре дә, соңгылары да түгел, барысы да шулай итә», – дип серне ачкан.

Алия исә: "Без "реально" нинди исем кушарга белмибез... Моңа кемдер ышанмый икән, ул аның эше", - дип җаваплаган. 

Шулай ук җырчыларга Радэль, Аделина, Амалия, Руслан, Самина, Язгөл, Булат, Рамазан, Кәрим кебек исемнәр дә тәкъдим иткәннәр.