Чаллыда инвалидлар өчен машина кую урыннарын тикшерәләр

Белгәнебезчә, инвалидларга машиналарын кую өчен аерым урыннар билгеләнгән. Әмма мондый билгеләргә игътибар итми генә машиналарын куючылар күбәеп киткән. 12-14 август көннәрендә Чаллыда шундый 13 очрак теркәлде. 

Моны күздә тотып автокаланың ЮХИДИ инспекторлары, шәһәр буенча шушындый очракларны активрак тикшерә башлады. Инвалидлар өчен булган урыннарга машинасын парковкага куючы, әгәр бу социаль категориягә кермәсә, 5 мең сум күләмендә штрафка тартылачак (административ җаваплылыкның 12.19 матдәсенең 2 бүлеге буенча). Машинаның  хуҗасы урында булмаса – машина штрафстоянкага озатылачак. 

“Аеруча хастаханәләр янындагы инвалидлар өчен махсус урыннарга машина кую очраклары борчу уята. Бу бит хәтта кеше гомеренә битарафлык күрсәтүгә тиң”, – дип белдерде "Шәһри Чаллы" газетасына Чаллы ЮХИДИ идарәсе хезмәткәре Илдар Гайнуллин.