Мэрдан - акча, үзенә - кызыл галстук

Чаллы мэры Наил Мәһдиев шәһәр укучылар советы активы белән очрашты. Чаллыда  әлеге оешма барлыкка килүгә быел 18 яшь тулды.

Советта барлыгы 136 укучы-депутат эшли. Чаллы укучылар Советы эшчәнлеге Татарстанның иң яхшы инновацион идеяләре бишлегенә кергән. 140 оешма арасында Чаллы укучылар советы оешмасы республикада иң яхшысы дип табылган.

Наил Мәһдиев оешманы: «Уңышлы проект. Ул актив балаларга тормышта үз урыннарын табарга ярдәм итә. Сез республикада иң текә укучылар оешмасы», – дип бәяләде.

2023 елда укучылар советы урнашкан 15нче балалар иҗат үзәгенә 45 ел тула. Шул уңайдан биредә «Ковер» интеллектуаль мәйданы булдырырга телиләр. Моның өчен мэрдан 200 мең сум акча сорадылар .

Мэр укучылар советының үтенечен кире какмаячагын белдерде. «Чаллыда белем һәм тәрбия алу өчен барлык мөмкинлекләр  бар. 8 елда 6 заманча мәктәп төзедек. Алар барысы да кирәкле җиһазлар белән тәэмин ителгән.  Без заманча мәктәпләрдә инициативалы, тормышка эзерлекле яшьләр укысын өчен акчаны кызганмыйбыз», – диде ул.

Быел пионер оешмасының тууына 100 ел тулды. Шул уңайдан очрашуда шәһәр мэрына кызыл галстук һәм пионер значогы бүләк иттеләр.