Чаллыда яшәүче 76 яшьлек хатын-кыз мошенниклар "кармагына" эләккән

Хатын-кыз банк сайтына кереп, «инвестиция пакеты»н сатып алырга тели. «Менеджерлар» аңа әлеге пакетны алу өчен махсус сылтама җибәрәләр. Шул рәвешле шәһәрдәшебез өч ай дәвамында таныш булмаган номерларга һәм бер ир-атның картасына 260 мең сум акчасын күчерә. 

Акчаларны алгач, мошенниклар элемтәгә чыгудан туктый. Шуннан соң гына пенсионер хатын-кыз алданганын аңлап, полициягә мөрәҗәгать итә. 

Әлеге факт буенча «Мошенниклык» РФ Җинаять кодексының 159нчы маддәсенең 3нче өлеше буенча җинаять эше кузгатылган. Әлеге маддәнең санкциясе 6 елга кадәр иректән мәхрүм итүне күздә тота. Хәзерге вакытта полиция хезмәткәрләре җинаятьчеләрне эзләү һәм шәхесләрне билгеләү белән мәшгуль. 

Ел башыннан мондый «инвестицияләр» тәкъдиме белән 12 җинаять эше кузгатылган.