Равил Галиев: «Төнге 12гә кадәр театрда яттым»

Театр көне уңаеннан җырчы, ТР халык артисты Равил Галиевка шалтыратып, аны бәйрәме белән котладык. «Әйе, хәзер инде була (котларга)», – дип елмайды ул. Аның бер спектакльдә катнашыр өчен Аяз Гыйләҗев исемендәге Чаллы татар дәүләт театрына  эшкә кергәненә ике ай тулды.

«Ияләшеп киләм. Элек бу өлкәне тамашачы буларак, тыштан гына сокланып күзәтсәм, хәзер эчке ягын да белдем. «Болай икән бу..» дидем. Чөнки образга керү бер дә җиңел түгел, һәр деталь мөһим, берсен генә онытсаң да чылбыр буенча бар күренеш аксарга мөмкин.

Кичә премьера («Алтын алка» спектакле – ред.) алдыннан төнге 12гә кадәр «прогон» ясадык. Мондый репетицияләр барлыгын белү дә шаккаттырды» дип уртаклашты ул.

Һөнәри осталыклары белән бүлешкән хезмәттәшләренә, аеруча рольне ачып бирергә ярдәм иткән Илфат Әскәровка рәхмәтләрен җиткерде.