Тукранбаш (клевер) җыяр вакыт

Тукранбаш йөрәк-кан тамырлары авырулары өчен менә дигән шифа. Кырда үсүче кызыл тукранбашны кан тамырларын ныгыту һәм йөрәк-кан тамырлары системасы эшен яхшырту өчен кулланалар. 
Ул югары кан басымы белән интегүчеләргә дә ярдәм итә. Моннан тыш, тикшерүләр күрсәткәнчә, холестерин дәрәҗәсен нормальләштерә, ягъни зыянлы холестерин күләмен киметә.

Тукранбаш канны сыеклау үзлегенә дә ия. Кан йөрешен яхшырта. Тромблар барлыкка килү куркынычын киметә. Тукранбаш тромбозлар, атеросклероз һәм башка йөрәк-кан тамырлары авыруларын кисәтү максатыннан кулланалар. Ул канны һәм лимфаны токсиннардан чистарта, капиллярлар һәм кан тамырлары стенасын ныгыта.

Тик чама хисен тукранбашны кулланганда да онытырга кирәкми. Кемгәдер файда бирсә, икенче берәүгә ул зыян салырга да мөмкин. Операциягә керергә җыенучыларга аеруча сак булырга киңәш ителә. Тукранбаш канны сыегайту үзлегенә ия. Әлеге үсемлекне эчкән кеше, операция барышында күп кан югалтырга да ихтимал. Гормонга бәйле организмда шешләр булганда, йөклелек вакытында кулланырга рөхсәт ителми. 
 
Тукранбашны эчәр алдыннан, иң элек табиб белән киңәшләшергә, кан составын тикшертергә кирәк. Бары шуннан соң гына әлеге табигать шифасыннан файдаланырга була. Үзегезгә үзегез зыян эшли күрмәгез. 
 
Интернет челтәрендә шифа бирүче төрле рецептлар бар. Тукранбашны спитрлы эчемлекләргә салып та, киптереп, чәй буларак эчәргә дә була. Иң отышлысы – киптерелгән 5-6 чәчәкне, бер стакан кайнар суга салып төнәтеп кулланырга.