Чаллы пенсионерлары бакчаларга бушлай йөриячәк

14 апрельдә үтәчәк тендердан соң шәһәр яны бакчачылык ширкәтләренә пассажирлар йөртүче билгеле булачак. Әлеге хокукка ия булачак оешмага 39 маршрут буенча хезмәт күрсәтү бурычы йөкләнә.

 – Бу транспорт хезмәте генә түгел, ә бакчачылар өчен социаль ярдәм дә. Нигездә, аларның күпчелеген өлкән буын кешеләре, хөрмәтле ветераннар тәшкил итә. Заманында әлеге шәһәрдәшләребез калабызның икътисади, социаль-мәдәни үсешенә саллы өлеш керткәннәр. Шуңа да аларны бакчаларга йөртү – безнең изге бурычыбыз. Чаллы бу максатка ел да бюджеттан 15 миллион сум акча бүлеп бирүче бердәнбер шәһәр – дип белдерде Наил Мәһдиев. Былтыр Чаллыда бакчаларга бушлай йөрү хокукыннан 400 меңгә якын кеше файдаланган.

Шәһәр мэры билгеләп үткәнчә,  ягулык материалларына бәя арткан очракта да, социаль программа үз көчендә калачак.