Чаллыда әнисе һәм кызы мәчет төзелешенә дип, акчалы конверт калдырып киткән

Изге айда – сокландыргыч гамәл. Шәһәребездә төзелеп килүче “Җәмигъ” мәчете төзелешенә дип, әниле-кызлы шәһәрдәшләребез конверт калдырып киткәннәр. Дин әһелләре аны ачып карасалар 20 мең сум акчага тап булганнар. Шулай ук открытка эченә Айсылу исемле кыз: “Без бу акчаны әнием Римма белән мәчет төзелешенә үз өлешебезне кертү өчен җыйдык. Аллаһ бу гамәлебезне кабул итсә иде”, - дип язып та куйган. 
"Шәһәрдәшләребезнең бу күркәм гамәленнән күңелләребез тулды. Аллаһ алардан разый булсын. Шөкер, икътисадый авыр шартлар булса да, хәйриячелек белән шөгыльләнүчеләр кимеми", - ди “Җәмигъ” мәчете имамы Мөхәммәт хәзрәт Мөхәммәтов.

Мәгълүм булганча, агымдагы елның беренче кварталында мәчет төзелеше фондына кергән акчаның 2 млн 125 мең сумы нәкъ менә гади халык сәдакасыннан җыелган. Бу хакта язманы моннан укый аласыз.
Исегезгә төшерәбез, мәчет төзелешенә финанс ярдәмен интернет-сайт аша да күрсәтергә була. Моның өчен https://fondjamig.ru сылтамасы буенча кереп, тәкъдим ителгән реквизитлардан гына файдаланырга кирәк. Шунда ук куар-код аша түләү мөмкинлеге дә булдырылган.

Илшат Солтанов

Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).