Чаллыда яңа мәчет ачылды

Бүген Чаллыда 16 нчы мәчет, “Изге ай” мәчете ачылды. Ул Залесный һәм Нурми Шәрипов урамнары киселешендә, 71нче бистәдә урнашкан. Бина проекты үзенчәлекле: манаралары 11 метр биеклектә, лалә чәчәге формасында. Куполы пыяладан эшләнгән, тәрәзәдә бизәкләр. Фасадында мөселман символлары – сигез канатлы йолдыз. Төнлә утлар кабына. Намаз уку залы 140 кешегә исәпләнгән. “Изге ай” мәчете халык җыйган акчага салынган, беренче субайны тантаналы рәвештә 2016нчы елның 25 июнендә кактылар.