Чаллыда йорт ишегалларын тәртипкә китерә башладылар

13 һәм 59 комплексларга техника һәм эшчеләр керде. «Безнең ишегалды» программасы кысаларында йорт яны территорияләре төзекләндерелә. Хәзерге вакытта 6 йорт ишегалдын тәртипкә китерәләр. Җәяүле юлларын яңартып ясыйлар, балалар мәйданчыгын үзгәртәләр, һ.б. Эшләрне «Камавтодор» подряд оешмасы башкара. 

«Максатыбыз – халык теләкләрен исәпкә алып эшләү. Хәзер булган сорауларны хәл итәбез», – ди Автозавод районы башлыгы Эдуард Фәттәхов. 

Исегезгә төшерәбез, «Безнең ишегалды» программасы кысаларында Чаллыда быел 32 йорт төзекләндереләчәк. Әлеге программа ТР Рәисе Рөстәм Миңнеханов тарафыннан булдырылды. Максаты - 2014 елга кадәр төзелгән йорт яны территорияләрен тәртипкә китерү. Программа кысаларында юллар ясала, машина кую урыннары зурайтыла, яңа эскәмияләр, чүп савытлары, яктырткычлар урнаштырыла. Балалар мәйданчыгы да ясыйлар. Чаллыда 4 ел эчендә 420дән артык ишегалды тәртипкә китерелде. Программа кысаларында ремонтланачак йорт ишегаллары исемлеге монда язылган.  

Фотолар шәһәр хакимияте сайтыннан