Җырчы Иркәнең борчуы бар

Татарстанның атказанган артисты Иркә үзенең социаль челтәрләрендә махсус хәрби операция зонасындагы иреннән авыр хәбәр алуын әйтте. 

«Кызганыч, Артурдан күңелсез хәбәрләр бар. Ул каты яраланган. Йөрәк әрни, күңел өзелә....Әлегә сөйли дә, яза да алмыйм. Терәк булганыгыз өчен һәммәгезгә рәхмәтлемен», –  дип кыска җөмләләр белән генә үзенең халәте турында язган. 

Артур күптән түгел генә кыска вакытлы ялга кайткан иде. Ул кызлары Әминә һәм Сөембикә белән диңгездә ял итте. 

«Каршы алу, бергә үткәргән көннәр кадерле дә, күңелле дә. Ә менә якын кешеңне озату авыр», – дигән иде җырчы «Шәһри Чаллы» журналистына.

 

Иркәгә иренең терелеп, гаиләсе янына кайтуын телибез.