Чаллыда тагын зур дини бәйрәм көтелә

30 март көнне Чаллыда зурлап Ураза гаетен билгеләп үттеләр. Иртәнге 7дә шәһәребез мәчетләрендә гает вәгазе укылды, соңрак бәйрәм намазы кылынды. Аерым мәхәлләләрдә кунакларны хәтта пылау, тәмле чәй белән сыйладылар.

«Нур-Ихлас» мәчетендә гает вәгазен Чаллы имам-мөхтәсибе Әлфәс хәзрәт Гайфуллин укыды. Чарада елдагыча шәһәр мэры Наил Мәһдиев, башкарма комитет җитәкчесе Фәрит Сәлахов, «Җәмигь» мәчете төзелеше фонды директоры Уел Хөсәенов катнашты. Алар беренче сафка басып бәйрәм намазы укыдылар.

Сәгать 10нан «Тәүбә» мәчете янында Ураза гаете уңаеннан гаилә бәйрәме уздырылды. Аны Рамазан аена багышланган мөнәҗәтләр белән «Нур» ансамбле  башлап җибәрде. Сәхнәдә «Дельта» спорт клубы чыгыш ясады, «Энҗе бөртекләре» театры төркеме тарафыннан «Башак» әсәре куелды, яшь Коръән укучылар бәйгесендә җиңгән Рәхим Гасимов Аллаһ китабын укып таң калдырды.

Аттракционнар, «Хәят» мөслимәләр җәмгыяте, «Тәрбия» гаилә үзәге, «J-GET» робототехника клубы, «Подросток» клубы, «Спасатель рядом» проекты һәм башка остазлар тарафыннан уздырылган күпсанлы остаханәләр, конкурслардан, спорт ярышларыннан әти-әниләр дә, балалар да бик канәгать калдылар.

Чарада хәләл ризык белән тәэмин итүче балалар бакчалары һәм мәктәпләре җитәкчеләренә Чаллы мөхтәсибәте исеменнән рәхмәт хатлары тапшырылды. Ярышларда һәм  Рамазан ае дәвамында үткәрелгән «Идущие в темноте» бәйгесендә җиңүчеләргә дипломнар һәм иганәчеләрдән бүләкләр тапшырылды. Бәйрәмдә «Хәләл әйберләр ярминкәсе» дә эшләде. 

3 айдан соң, Корбан гаете уңаеннан да Чаллыда шундый зур бәйрәм үткәреләчәк, дип хәбәр итте шәһәр мөхтәсибәте.