Апрель аенда кемнәрнең пенсиясе арта?

Социаль фондның Татарстан бүлеге 1 апрельдән дәүләт тәэминаты буенча пенсияләрне, шул исәптән социаль пенсияләрне дә 14,75% ка индексацияли. Бу яңалык республикада яшәүче 85 меңнән артык кешегә кагылачак.
Индексация күләме узган елда пенсионерларның яшәү минимумы үсешеннән чыгып исәпләнә. 

Социаль пенсияләрне хезмәт стажы булмаган яки иминият пенсиясе билгеләү өчен эш стажы җитәрлек булмаган гражданнар ала. Моннан тыш, бу түләүләр инвалидлыгы булган һәм туендыручысын югалткан кешеләргә дә тиеш.

Социаль пенсияләр  белән бергә түбәндәге категориягә караган гражданнарның пенсияләре индексацияләнәчәк:
– Бөек Ватан сугышында катнашучылар;
– «Блокададагы Ленинградта яшәүчегә»,  «Камалган Севастопольдә яшәүче»  яисә «Камалган Сталинградта яшәүче» билгесе белән бүләкләнгән гражданнар;
– чакырылыш буенча хәрби хезмәткә алынган хәрби хезмәткәрләр һәм аларның хезмәткә сәләтсез гаилә әгъзалары;
– радиация йогынтысына дучар булган гражданнар һәм аларның хезмәткә яраксыз гаилә әгъзалары;
– космонавтлар һәм очучы-сынаучылар.

«Пенсияләр арттырылган күләмдә моңа кадәр гамәлдә булган график буенча киләчәк. Гражданнарга гариза бирергә кирәкми», - диде ТР буенча Социаль фонд бүлеге идарәчесе Эдуард Вафин. 

Сорауларыгыз булган очракта, сез дүшәмбедән пәнҗешәмбегә кадәр - 08:00 дән 17:00 гә кадәр, җомга көнне - 08:00 дән 15:45 кә кадәр  8 800 100 0001 телефоны буенча (шалтырату бушлай) бердәм контакт-үзәккә шалтырата аласыз.