Автозавод районы территориаль иҗтимагый үзидарәләре

Бу районның территориаль иҗтимагый үзидарәләре грантларны оту буенча лидерлар рәтендә тора. Соңгы биш ел эчендә алар төрле конкурсларда катнашып, грантлар отып 33 миллионнан артык акча керткәннәр. 2020 елда республикакүләм “Иң яхшы территориаль иҗтимагый үзидарә” конкурсында беренче өчлектә Автозавод районы территориаль иҗтимагый үзидарәләре тора.

– Бу акчаларның күбесе балалар, спорт мәйданчыклары, тренажерлар, эскәмияләр урнаштыруга тотылды, – ди Венера Михайловна. – Шулай ук без өмәләрдә актив катнашабыз. Бер ел эчендә генә төзекләндерү буенча 600дән артык чарада катнаштык.

Масленица бәйрәме, шәһәр көне, күршеләр көне, Сабантуй бәйрәме, Җиңү Бәйрәме – болар барысы да территориаль иҗтимагый үзидарәләреннән башка узмый.

Венера Наумкина ике РФ Президенты грантына да ия булды. 2017 елда ул этләр мәйданчыгы булдыру турындагы грантны отты. 2019 елда – “өй янында фитнес” проекты РФ Президенты тарафыннан хупланды. Бу проект кысаларында белгечләр барлык теләүчеләргә фитнес күнегүләре күрсәтәләр. Шулай ук биредә яшәүче халык табиблар белән дә очраша ала.

Автозавод районы территориясендә кызыксынулар буенча клублар эшли.

– Аларның берсендә бакчачылар җыелалар, үзләренең тәҗрибәләре белән уртаклашалар, аннан бик күп файдалы мәгълүмат алырга була, – ди Венера Михайловна. – 28нче мәктәп бинасында өлкән буын кешеләре өчен теннис өстәлләре тора, теләгән һәр кеше бирегә килеп теннис уйный ала. Шулай ук безнең халык таяклар белән йөрүне дә үз итәләр.

Автозавод районында “Безнең ишегалды” республика программасы кысаларында былтыр 26, 27, 28, 47нче комплекслардагы дүрт ишегалды төзекләндерелде. Биредә квартал эчендәге юллар ремонтланган, машина кую урыннары киңәйтелгән, җәяүлеләр өчен юл булдырылган, яңа эскәмияләр, чүп савытлары, уен мәйданчыклары элементлары куелган. Быел 29, 30, 46, 48нче комплексларындагы дүрт ишегалдында ремонт эшләре башкарылачак.