Балаларга Яңа ел бүләкләре алуга бюджеттан 9,4 млн сум тотылды

Чаллыда 23615 балага Яңа ел бүләге тапшырдылар. Шәһәр бюджетыннан 9,4 млн сумга якын акча сарыф ителде. Бу хакта башкарма комитет җитәкчесе урынбасары Рамил Хәлимов җиткерде.

Бүләкләр 4 категория балаларга бирелде: бюджет өлкәсе, дәүләт учреждениеләре хезмәткәрләре балалары (15326 бала), аз керемле гаиләдә үсүче инвалид-балалар, авыр хәлдә калган, ятим сабыйлар (2826 бала), Россия, республикакүләм олимпиадаларда, конкурсларда җиңүчеләр, җәмәгать оешмалары активистлары (3820 бала) һәм махсус хәрби операциядә хезмәт итүче ир-атларның балалары (1643 бала).