Чәчәкләр өстенә менеп туктаган егеткә - штраф

Чаллы инспекторлары тюльпаннар өстенә менеп туктаган Лада машинасы хуҗасын җаваплылыкка тартты. 23 яшьлек егет юл кагыйдәләрен боза. Королёв урамы буенча хәрәкәт иткәндә, кисәк юллар киселешендәге клумба өстенә менә һәм Яр Чаллы проспектына таба борыла.

«Фото аша машина хуҗасын эзләп таптык. Аңа 2250 сум күләмендә штраф салынды», – дип белдерде Чаллы дәүләт автоинспекциясенең пропаганда бүлеге башлыгы Илдар Гайнуллин.

Машина йөртүче юл кагыйдәсен бозуы белән килешә. Әмма мондый адымга чарасызлыктан баруын аңлата. Академик Королёв урамында светофорның кызыл уты янгач, киселештә аның машинасына урын калмый. Бу вакытта тынычлык проспектыннан машиналар хәрәкәт итә башлый. Ул аларга комачауламас өчен чәчәкләр өстенә менеп басарга мәҗбүр була.