Чаллыда 2 яшьлек сабый бер уч дару ашаган

Чаллыда көтмәгәндә фаҗига була язды. Әнисе төшке аш әзерләгән чакта 2 яшьлек малай тынычландыручы дарулар ашый. Ана кеше әйтүенчә, пачкадагы даруларның яртысы юкка чыга. Малай күзгә күренеп хәлсезләнә. Артериаль басымы төшә. Ярый, тиз арада ашыгыч ярдәм машинасы килеп җитә. Фельдшерлар Анастасия Холкина һәм Марина Петрова баланың ашказанын юдыралар, детоксикация чаралары кулланалар. Балага бераз хәл керә башлагач, КДМЦга алып китәләр. Сабый бүген исән-имин һәм өендә, дип хәбәр итә сәламәтлек саклау идарәсе.