Чаллыда 200дән артык йөк машинасы хуҗаларына протокол төзелде

Чаллы халкы социаль челтәрләрдә шәһәр проспектлары буйлап йөрүче йөк машиналарына зарланып чыккан иде. Алар яңа салынган юллар торышы өчен борчылды. "Эссе көндә асфальт-бетон катламы тиз таушала. Хәсән Туфан проспекты тагын җимерелә инде", - дип яздылар. Әлеге проблеманы шәһәр мэры Наил Мәһдиев игътибарсыз калдырмады. Закон бозучыларга катгый чаралар күрергә кушты. 

Чаллы автоинспекциясе хезмәткәрләре тикшерү үткәрде. 5 көн эчендә алар 220 административ протокол төзеде. Машиналарның күбесе йөкләрен ачык килеш ташыган. Кайберләре юл кагыйдәләрен бозган. 

Исегезгә төшерәбез, йөк машинасы белән юлларны бозган шофёрга 5-10 мең, вазифаи затлар - 25 мең, юридик затларга 300 мең сум штраф каралган. 

Фотолар Чаллы Автоинспекциясенең пропаганда бүлегеннән алынды