Чаллыда Озеро торак комплексына таба юл салалар

Иртәнге сәгать 8дә Чаллы мэры төзүчеләр һәм журналистлар белән Нариманов урамында очрашты. Раскольников урамы белән киселеш боҗрасыннан башлап Озеро торак комплексына кадәр юл төзелә. 

Яңа юлның озынлыгы - 700 метр. Ул 4 полосалы булачак. Эшләрне "РБР-16" компаниясе башкара. Бетон эшләре тәмамланган, тиздән өстеннән асфальт җәя башларга планлаштыралар. Юл буйлап яктырткычлар да урнаштырылачак. Хәзерге вакытта яңгыр коеларын ясау белән шөгыльләнәләр. 

"Проект буенча 3 метрлы тротуар гына каралган иде. Әмма шәһәрдә 5 метрлы җәяүлеләр юлына күнектек. Велосипедчылар өчен дә юллар кирәк. Шуңа күрә проектка төзәтмәләр керттек", - ди "РБР-16" компаниясенең генераль директоры Таһир Сөнгатуллин.

Юл "Куркынычсыз һәм сыйфатлы юллар" милли проект кысаларында төзелә.

"Президент Владимир Владимирович Путин тарафыннан булдырылган милли проектлар бар. Әлеге юл шул проектларның берсе кысаларында ясала. Төзелеп килүче микрорайон өчен әлеге юл бик кирәк. Проект буенча биредә 200 мең кв. метр йорт төзү планлаштырыла, 30 меңгә якын кеше яшәячәк. Уйлап карасаң, республиканың бер муниципаль районы кебек", - ди мэр Наил Мәһдиев.