Каникулларда укучылар нинди предприятиеләрдә эшли ала?

Чаллыда җәйге каникулларда 14-18 яшьтәге 3 меңнән артык баланы эш белән тәэмин итәчәкләр. Июнь аена 1300 балага юлламалар тапшырганнар. Эшкә урнаштыру дәвам итә. Июль аенда - 1 мең, августта 800-900 укучыны эшкә урнаштыру планлаштырыла. 

«Балалар бюджет учреждениеләрдә, шулай ук “КАМАЗ” ААҖ бүлекчәләре, “КАМАЗжилбыт», «Логистика үзәге” компаниясе, Мәдәният һәм ял итү паркы, “РИАТ”, “Челны-Холод”, Чаллы ТЭЦы, Электр челтәрләре, “Чаллы икмәге” кебек предприятиеләрдә эшли алачак. Исемлектә шәхси оешма-предприятиеләр дә бар. Балалар, нигездә, шәһәрне яшелләндерү, чәчәкләр утырту, чүп утау, су сибү белән шөгыльләнәчәк. Упаковщик, менеджер ярдәмчеләре булып урнашучылар да бар. Мөстәкыйль рәвештә эшкә урнашкан балалар машина юучылар, “Вкусно и точка”,  “Бургер Кинг” туклану пунктларында, “OZON”, “Яндекс Маркет” кебек маркетплейсларда эшлиләр. Кемдер белдерүләр тарата», – ди «Россия эше» кадрлар үзәге Татьяна Быданова. 

Кайбер предприятиеләр 30 мең сумга хезмәт хакы түли. Бу хакта монда яздык.