Прививка ясаткач нигә кул авырта?

Йогышлы авырулар хастаханәсе инфекционисты Светлана Железнова әйтүенчә, вакцинаны күп итеп керткәндә тире һәм мускулларның реакциясе барлыкка килергә мөмкин, шуңа күрә коронавирустан вакцинациядән соң, кайбер кешеләр кулында авырту тоя. “Аденовирус һәм коронавирусның бер өлешеннән торган вакцина компоненты кертелә. Инъекция урынында матдәнең концентрациясе зур була, аңа организмга таралырга вакыт кирәк. Укол ясаганда нерв күзәнәкләренә эләксә дә кулда авырту барлыкка килүе ихтимал. Уколны дөрес куйсаң, берни дә авыртмаячак. Барысы да стериль эшләнә, әмма техник хата аркасында авыртырга мөмкин”, - ди ул. Прививка ясау кампаниясе өч препарат белән үткәрелә: “Спутник V”, “ЭпиВакКорона” һәм “КовиВак”. Кабат вакцинацияләү өчен белгечләр бер компонентлы “Спутник Лайт”ны тәкъдим итә.

Шушы көннәрдә шәһәргә “КовиВак” вакцинасы кайтарылырга тиеш. Сәламәтлек саклау идарәсе белгечләре әйтүенчә, ул аз күләмдә, шунлыктан аны беренче чиратта алдан язылган кешеләр алачак.