Ресторан урынына - мунча

Танылган «Арарат» рестораны бинасында мунча булачак. Мәгълүм булганча әлеге бина берничә ел буш торды, биредә балалар уйнап янгын да чыгарган иде. Шунда бер баланың гомере өзелде.
Бинаның яңа хуҗалары биредә гаилә мунча үзәге төзергә җыеналар. Милек хуҗасы фасад һәм түбәне яңартырга җыена. Милек хуҗасының әтисе Мидехәт Кадыйров әйтүенчә,  реконструкция кысаларында бинаның бер өлешен сүтәргә туры киләчәк. «Без җирне сатып алгач аны нишләтергә белмәдек. Аллаһка шөкер, безгә халыкка көнкүреш хезмәте күрсәтергә рөхсәт иттеләр. Моңа кадәр ресторан итмәкче иделәр. Бу – харам. Без мунча төзергә телибез. Проект яхшы. Ышанмасагыз, Алабугага килеп карагыз, безгә бөтен Россиядән килеп, гаиләләре белән ял итеп китәләр. Шуңа күрә Чаллы үзәгендә дә шундый объект төзисебез килде», –  диде җәмәгать тыңлауларында Мидехәт  Кадыйров.
Фото «Челныбиз»дан алынды.