Сәламәтлек саклау учреждениеләре ничек эшли?

Май бәйрәмнәрендә Татарстанның медицина учреждениеләре махсус эш режимына күчә. Республика Сәламәтлек саклау министрлыгының матбугат хезмәтендә шул хакта хәбәр иттеләр.

Татарстан халкын 1-4 майда һәм 8-11 майда бәйрәм һәм ял көннәре көтә. Әмма дәүләт медицина учреждениеләре өзлексез медицина ярдәмен тәэмин итү өчен эшен дәвам итәчәк.

Стационарлар һәм бала тудыру йортлары тәүлек буе эшләячәк. Татарстанлылар олылар һәм балалар поликлиникаларына 8.00-18.00 сәгатьләрдә килә ала. Халыктан чакырулар кабул итү поликлиника эше төгәлләнергә бер сәгать кала тәмамланачак. Поликлиникаларда май бәйрәмнәрендә шулай ук диспансеризация һәм вакцинация үткәрелә, хатын-кыз консультацияләре дә эшен дәвам итә.

Олылар һәм балалар стоматология поликлиникалары 9.00-18.00 сәгатьләрдә эшләячәк, ә тәүлек буе эшли торган травматология пунктлары пациентларны яшәү урынына карамастан кабул итәчәк.