Түбән Камада фатирда самогон аппараты шартлагач, ир белән хатын имгәнгән

Түбән Кама шәһәрендә бер фатирда самогон аппараты шартлаган. Шуннан соң ир белән хатын имгәнгән. Бу турыда «Татар-информ» агентлыгына Россия Гадәттән тыш хәлләр министрлыгының Татарстан буенча Баш идарәсендә хәбәр иттеләр.

17 августта унынчы яртылар тирәсендә 112 номерына шалтырату килә. Бакый Урманчы урамындагы 29нчы йортта шартлау турында хәбәр итәләр.

Урынга коткаручылар килеп җитә. Сигезенче каттагы өч бүлмәле фатирда самогон кайнатканда аппарат ватылуы һәм шартлавы ачыклана. 

Шартлаудан соң фатирдагы йокы бүлмәсендә һәм кухняда тәрәзәләр ватылып беткән, балкон рамы да очып чыккан. Ул биеклектән аска төшеп, ишегалдында туктап торган машиналарны җимергән.

37 яшьлек ир һәм 39 яшьлек хатын имгәнгән, аларны хастаханәгә озатканнар. Биш һәм унике яшьлек ике бала ерак бүлмәдә булган, аларга зыян килмәгән, унөч яшьлек олы балалары бу вакытта урамда булган. 

Чыганак: Интертат