Телефон аша алдауның яңа төрле ысулы чыккан

Мошенниклар Россиядә яшәүчеләргә кәрәзле элемтә операторлары сыйфатында шалтырата башлаган, дип хәбәр итә ВТБ банкының матбугат хезмәте. 

Кешеләргә аларның шәхси кабинеты яки телефонына «башка кешеләр кергән» дип хәбәр итәләр, ә аннары, шәхси мәгълүматларны урлауны булдырмас өчен дигән сылтау белән ышнадырып, махсус USSD-команда җыярга кушалар.
Шулай итеп, абонент үзенең сим-картасында көйләүләрен мөстәкыйль рәвештә үзгәртә һәм СМС һәм шалтыратуларны мошенник номерына килә торган итеп билгели.

Үз-үзеңне җинаятьчеләрнең гамәлләреннән саклау өчен смартфонга номерны билгели торган кушымта куярга һәм таныш булмаган номерларга җавап бирмәскә кирәк, дип киңәш итә ВТБ банкының өлкән вице-президенты Никита Чугунов. Ә сөйләшү вактында әңгәмәдәшнең шәхесе турында бераз гына шик уянса да, әңгәмәне туктатырга кирәк.

фото: www.grozny-inform.ru