Әнисе үлеме өчен генә җавап тотмаячак - ВИДЕО

Квадроцикл белән ир-ат идарә итә, аның әнисе – 63 яшьлек хатын-кыз – артта утырып бара. Тауга менгән чакта, транспорт артка таба төшә башлый, аннары әйләнеп каплана. Пассажир хатын квадроциклдан очып төшә һәм транспорт астында кала.

– Без печән артыннан киттек. Прицепка шактый гына печән төядек, инде өйгә кайтканда, тауга менеп барганда, минем квадроцикл артка тәгәри башлады. Прицеп исә әйләнеп капланды. Без дә транспорттан чыгып очтык. Әни квадроцикл астында калды һәм үлде... – дип шок хәлендә сөйли руль артында булган ир-ат. 

– Квадроциклны ир-ат үзе ясаган булган. Әлеге транспорт чарасының номеры да булмаган. Андый транспортны, әлбәттә, учетка да куймыйлар. Бу эш белән хәзер тикшерү комитеты хезмәткәрләре шөгыльләнә. Ир-атка мондый транспортта йөргәне өчен дә, аның гаебе белән  кеше үлеме өчен дә җәза яный, – дип сөйләде безгә Тукай районы буенча ЮХИДИ бүлеге җитәкчесе Шамил Ганиев. 

Татарстан прокурорының өлкән ярдәмчесе Руслан Галиев сүзләренчә, квадроцикл белән идарә итүче ир-ат үзе дә имгәнгән. Аның туганының улы – 11 яшьлек малайның кулы сынган. Аны хастаханәгә илткәннәр.