Белгечләр сәбәбен газ баллоныннан күрә.
“Весна-2” бакчачылары төннәрен кичә уяу уздырырга мәҗбүр булды. Йортларның берсендә көчле шартлау булды. Сәбәбе газ баллоны белән бәйле.
- Вакыйга төнге 10 тулып киткәч булды. Урынга тиз арада коткаручылар, табиблар килеп җитте. Бәхеткә зыян күрүчеләр юк. Өй хуҗалары шәһәргә кайтып киткән иде. Фаҗига турында ишеткәч, килеп җитәләр”, - ди “Весна-2” бакчачылык ширкәте рәисе Илгиз Шәяхмәтов.
Бер катлы йорт танымаслык хәлдә. Җимерек. Хәзерге вакытта салынган зыян күләме ачыклана. Шунысы аяныч – йорт иминиятләштерелмәгән.
“Бакчачыларның күбесе баллоннарга газны авто-газ станцияләрендә салдырта. Бу дөрес түгел. Анда күпме газ салынганлыгы контрольдә тотылмый. Күбрәк тә салырга мөмкиннәр. Шуңа күрә баллон басым нәтиҗәсендә шартлый. Газны махсус станцияләрдә салдырырга кирәк”, - ди Илгиз Шәяхмәтов.
Хәзерге вакытта тикшерү эшләре бара. Газ баллонының шартлау сәбәпләре ачыклана.
Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).
Нет комментариев