Яңа ел бәйрәмнәре дә булмаячакмыни инде?

Һәрхәлдә, илебез башкаласы Мәскәүдә Яңа ел бәйрәмнәре үткәрелмәячәк. Бу хакта кичә Мәскәү мэры Сергей Собянин белдерде.

"Яңа елга кадәр әле ерак. Әмма коронавирус пандемиясенә бәйле массакүләм чаралар, шул исәптән Яңа ел бәйрәмнәре дә үткәрелмәячәк", - диде ул үзенең Беренче каналга биргән интервьюсында.

Халык күп җыела торган мәдәни күңел ачу чаралары, шул исәптән концертлар да әлегә туктатылып торуы турында Мәскәү хөкүмәтенең сәүдә һәм хезмәтләр департаменты башлыгы Алексей Немерюк та хәбәр иткән иде.

Яңа ел төнендә илебез башкаласында комендант сәгате кертелми, теләгән һәркем урамда, саф һавада йөри һәм фейерверклар ата алачак. Ә менә рестораннар һәм төнге клублар бикле булачак.


Фото: mirkosmosa.ru